Surat ti Nini Emeh

Nini Emeh keur huleng jentul di imahna, mikiran can mayar listrik jaba minyak bengsin jeung minyak tanah nararaek, hahargaan jadi arundak. Indit-inditan sakalieun ka pasar ge ayeuna mah ongkos teh jadi ngalipet, matak pantes unggal poe nini emeh mah gawena ngan huleng jentul mikiran hahargaan nu teterekelan, sedengkeun kuli tandur jeung ngarambet mah hese naekna buruh teh. Biasana mah sok sagawe-gawe di Haji Dulmajid alias kedul ka masjid, aya ngarambet, ngored, atawa nyeuseuh jeung ngistrika di imah nu beunghar.

Harita mah si nini jadi males, males anu lain bobodoan jiga nu euweuh gadag kana digawe. Ngan sabot ngahuleng di golodog, bray  aya lham
rek menta duit kanu Maha Kawasa, teu talangke nini Emeh gutrut nulis dina buku incuna ku patlot-patlot acan nulisna ge kieu eusi suratna teh:"Nun Gusti mugi Gusti masihan artos ka abdi saratus rebu weh, upami bade masihan Gusti, teu hilap abdi ngahaturkeun nuhun. Kitu eusi suratna teh ringkes pisan.

Sanggeus nulis surat terus meuli amplop jeung parangkona ka hiji toko, sup suratna diasupkeun kana amplop  terus diparangkoan dirapet ku remeh mani ngajendul da remehna sapuluh siki, heheh….si nini seuri sorangan. Bae ah meh pageuh, cenah.

Alamat Nini Emeh kumplit Sip: Emeh Dusun Legok Hangseur Rt 04/07 Desa Cihitutbau Kacamatan Kalakaymurag kode Pos:4537333.

Ngan alamat nu ditujuna: Gusti nu Maha Welas tur Maha Asih dimana wae ayana cenah. Terus surat dikirimkeun langsung ka kantor Pos ku si nini da hayang buru-buru nepi kanu dituju. Pagawe Pos bingung nya kamana mikeun eta surat da teu puguh nu ditujuna make ka Gusti dimana wae ayana sagala.Antukna surat di ka kantor pulisikeun. Kulantaran pulisi nu keur jaraga panasaran hayang nyaho eta eusi surat, nya dibaruka ku tiluan dibacakeun ku saurang anggota. Ari eusina menta duit ka Gusti nu Maha Suci, pulisi karunyaeun sarta baradami jeung babaturanana, patungan 25 rebu sewang. Langsung dikirimkeun ka Nini Emeh da puguh alamatna. 

Barang katampa ku Nini Emeh duitna teu nyumponan kana pangabutuhna keur mayar listrik tea.           Teu talangke si nini nyuratan deui anu kieu unggelna :" Alhamdulillah geuning Gusti teh Maha welas tur Maha Asih ka umatna, dugi ka kontan masihan artos ka abdi. Mung artos teh nu katampi mung 75 rebu, artos teh kapayun mah tong dititipkeun kanu sanes,….nu atos-atos ge dikorupsi 25 rebu.

Surat terus dikirimkeun deui kawas tiheula, katarima deui di kantor pulisi, terus dibaraca deui.

Gelo teh,….., dasar nini-nini kolot ku maneh, kilangbara nganuhunkeun mah kanu mere teh, kalah hayoh nuduh korupsi. " Kasebelaan, ceuk anggota pulisi meh bareng. Cag ah.